|
Osmanlı Ordusu'nun Çanakkale'deki başarısından dolayı Petse Üniversitesi öğrencilerinin sevinç gösterilerinde bulunduğu / Peste Hilâl-i Ahmer Cemiyeti'nin Hilâl-i Ahmer yararına yemekli bir toplantı düzenlediği
Peste Bassehbenderliği
Aded: 10081/58
Hariciye Nezâret-i Sâmiyesi'ne
Ma‘rûz-ı çâker-i kemîneleridir
Türklere karsı mütehassis oldukları Turanî münasebet-i ırkıyelerinden mütevellid muhabbet-i sahîhalarını ibrâz emrinde, Müttefiklerimiz Macarlar hiçbir vechile fevt-i fırsat etmemekte, her vesile ile muhâdenetleri âsârını izhârdan hâlî kalmamaktadırlar. Ez-cümle Çanakkale'de ahîren ihrâz olunan muvaffakiyet hasebiyle Budapeşte Kordafrates denilen dârülfünûn fakülteleri talebe cemiyeti reisi Doktor Etiyen Çembedi'nin teşebbüsüyle Peste Dârülfünûn müdâvimlerinden mürekkeb bir hey’et Mart-ı Efrencî'nin 27'nci gecesi bassehbenderhâne önüne gelerek leyliyyeler tegannî eylemek sûretiyle izhâr-ı sâd-mânî eylemişler ve bilâhare her fakülteden intihâb olunan murahhaslar bizzat nezd-i âcizîye çıkarak te’yîd-i muhâlasat etmelerine mukabil, yegân yegân murahhaslar taraf-ı kemterîden i‘zâz ve taltif kılınmısdır ve teşekkür edilmiştir.
Müteâkiben öteden beri Peste Hilâl-i Ahmer Şubesi’nin teşvikiyle Hilâl- i Ahmer menfaatine müsâmere tertib eyleyerek hasılattan bir kısmını bu emr-i hayra tahsis ve ihdâ ede gelen ve Peste'nin en büyük lokantası olan Gamirinos Taâmhânesi'nde tertib edilen ziyâfet ve müsâmerede Peste Hilâl-i Ahmer Komitesi Reisi Başvekil-i sâbık Kont Koen Hedervari ve mebûsandan ve muharrirîn-i meshûreden Mösyö Pekar Gula ve komite azâlarından ve meb‘ûsândan birçok zevât hâzır bulunmuş ve edilen davet üzerine bassehbenderhâne memurîni ile birlikte işbu müsâmereye taraf-ı âcizîden dahi iştirâk kılınmısdır. Orada da askerî mûsikası tarafından zât-ı hazret-i Padişahî’nin marsı terennüm edilmiş ve hâzırûn bunu ayakda istimâ‘ ile alkışlamışlar, bilâhare dârülfünûn talebeleri dahi icrâ-yı terennümât eylemişlerdir. Obâbda emr u fermân hazret-i veliyyü'l-emrindir.
Fî 2 Nisan sene 1915
Peste Bassehbenderi
Ahmed Hikmet
Bâb-ı Âlî
Hariciye Nezâreti
Umûr-ı Siyasiye Müdüriyet-i Umum iyesi
Mühimme Kalemi
Kayıd Numarası: 128
Dahiliye'ye ve Başkumandanlık Vekâleti'ne
Çanakkale'de ahîren ihrâz olunan muvaffakiyet üzerine Peste'de Osmanlılar hakkında gerek nümâyis tarzında gerek hususî surette izhâr olunan âsâr-ı muhâdenete dair tafsilâtı hâvî olarak Peste Bassehbenderliği'nden alınan fî 2 Nisan sene [1]915 tarihli tahrîrâtın sûreti leffen tesyâr kılındı. Bunun bir sûreti de Başkumandanlık Vekâleti'ne gönderildi, efendim.
7 Nisan sene 1331 / 20 Nisan 1915
BOA, HR. SYS, 2322/74
|
