|
Bâb-ı Âli
Hariciye Nezâreti
Umûr-ı Siyasiye Müdüriyet-i Umum iyesi
Mühimme Kalemi
Aded: 64318/238
Dahiliye Nezâret-i Celîlesi'ne
Devletli efendim hazretleri
Yunan Hükümet-i hâzırasının siyaset-i hariciyece vaziyet-i hâliyesine dair Atina'daki sefirimiz Galib Kemalî Bey'den alınan 344, 353, 354, 358, 359 numaralı beş kıt‘a telgrafnâmenin sûretleri 7 Nisan sene 1331 tarihli ve 64207/234 numaralı tezkire-i senâveri ile gönderilmisdi. Sefir-i müsârunileyhden bu bâbda zeylen vürûd eden telgrafnâmeye nazaran Yunan Hariciye Nâzırı Venizelos tarafdârı gazetelerin nesriyâtına büyük bir ehemmiyet atfedilmemek lâzım gelip filhakika müzâkerât vukû‘ bulmuş ise de erkân-ı harbiye hey’eti serâit-i hâzırada harbin aleyhinde olduğu cihetle Yunan Hükümeti düvel-i Müttefika'nın Çanakkale'ye dört-beş yüz bin kişi gönderdiklerini görmedikçe ve bu teşebbüsün muvaffakiyetle neticeleneceğinden emin olmadıkça yürüyemeyeceğini Galib Kemalî Bey'e söylemisdir. Sefir-i müsârunileyh tedâbîr-i tedâfu‘iyemizin ehemmiyeti hakkında nâzır-ı mûmâileyhete’minât-ı cedide î‘tâ ve neticesi meçhûl olan bu ise girismekde Yunan Hükümeti’nin ma‘rûz kalacağı tehlikeye yeniden nazar-ı dikkati celb eylemisdir.
Hariciye nâzırı Marmara sevâhili civarında sakin Rumlar aleyhine ittihâz olunan hâl ve tavr-ı cedîdden şikâyet eylediği cihetle Galib Kemalî Bey nâzırın bu hususta aldığı malûmât sahih ise bunun sebebini mevzû‘-ı bahis olan nesriyâtda aramak lâzım geldiği cevabını vermisdir. Tesebbüsât-ı resmiyeye gelince;
Hariciye nâzırı tesebbüsât-ı mezkûre hakikat-ı hâle muvâfık değilse de bu tesebbüsât efkâr-ı umumiyeye ve düvel-i saireye karsı ... (telgrafnâmenin burasında bir kelime noksandır) edememiş olduğunu ifade etmisdir. Nâzır-ı mûmâileyh hâtime-i makalesinde bütün bî-taraf hükümetlerin hemen Müttefiklerimiz üzerine düşeceklerini hisseylediğini (croit flairer) beyân ve hatta konsoloslardan aldığı raporlara nazaran Bulgaristan Hükümeti'nin bize bağteten tecâvüz etmek üzere pek hafî surette istihzârât-ı askeriyede bulunduğunu ilâve etmisdir. Bulgaristan'ın bize karsı istihzârât-ı askeriyede bulunduğu hakkındaki rivayetin tahkîki lüzumu Sofya'daki sefirimize tavsiye olundu.
Alınacak cevap taraf-ı âlîlerine tebliğ olunacaktır. Yunan Hariciye nâzırının Marmara sevâhiline karîb mahallerde sakin Rumlar hakkındaki beyânâtına nazar-ı dikkat-i âlîleri bilhassa celb olunur. Keyfiyet Başkumandanlık Vekâlet-i Celîlesi'ne de yazıldı, efendim.
Fî 6 Cumâdeluhrâ sene 1333 ve fî 8 Nisan sene 1331 / 21 Nisan 1915
Hariciye nâzırı nâmına
Umûr-ı Siyasiye Müdür-i Umumîsi
Ahmed Resid
BOA, DH. EUM. 3. Sb, 5/8
|
