Osmanlı Devleti'nin Gülnihal, Edremid ve Akdeniz Vapurlarıyla Sirket-i Hayriye'nin 60, 61, 63 ve 70 numaralı gemileri ile İngiliz Hükümeti'nin Depp, Asia ve Queen Alexandra isimli gemilerinin hastane gemisi haline getirildiği / İngiliz Hükümeti'nin, Osmanlı Devleti'nin hastane gemilerini asker nakli için kullandığı iddiasının asılsız olduğundan İngiliz denizaltılarınca hastane gemilerine yapılacak saldırıda öldürülen her yaralı Osmanlı askeri için bir İngiliz esirinin idam edileceği
Osmanlı Ordu-yı Hümâyûnu Başkumandanlığı Vekâleti Sube: 7 Numara: 2168/1978 Hulâsa: Hilâl-i Ahmer bayrağını hâmil mecrûhîn nakline mahsus vapurlara îrâs-ı mazarrat olunmamasının ifhâmına dair Hariciye Nezâret-i Celîlesi'ne Ma‘rûz-ı çâker-i kemîneleridir Çanakkale muharebâtında mecrûh düsecek zâbitân ve efrâdın İstanbul' anakline tahsis edilen Gülnihal sefinesiyle Sirket-i Hayriye'nin altmıs bir ve altmıs üç numaralı vapurları veya icab-ı hâle göre mecrûhîn irkâbıyla Hilâl-i Ahmer bayrağı altında Bahr-ı Sefîd Boğazı'ndan gelecek vapurlara Marmara havzasında tahtelbahirlerin îrâs-ı mazarrat eylemesinin ve bu hususda vukû‘a gelecek her türlü vekâyi‘den mütevellid mes’ûliyetin düsmana râci‘ olacağının ve zuhur edecek ilk vak‘a üzerine İstanbul'da bulunan İngiliz ve Fransız üserâsının vapurlarla menâtık-ı mühlikeye sevk edileceğinin Amerika Sefâreti vasıtasıyla ifhâmına müsaade-i sâmî-i dâver-i efhamîlerinin bî-dirîğ buyurulması bâbında emr u fermân hazret-i veliyyü'l-emrindir. 18 Mayıs 1331 / 31 Mayıs 1915 Baskumandan Vekili Enver
Bâb-ı Âlî Dahiliye Nezâreti Emniyet-i Umumiye Müdüriyeti Umumî Mahrem: 24 Mahremdir Hariciye Nezâret-i Celîlesi Cânib-i Âlîsi'ne Ma‘rûz-ı çâker-i kemîneleridir Su sırada Marmara Denizi'ne duhûle muvaffak olan düsman tahtelbahirlerinin her ne kadar İstanbul ile Boğaziçi, Kadıköy, Haydarpasa ve Adalar arasında öteden beri evkât-ı muayyenede muntazam seferler yaparak kasabanın gayr-ı muharib olan ahalisinin nakliyle mesgul olan Boğaziçi, Haydarpasa, Kadıköy ve Adalar Seyr-i Sefâin ve sirket vapurlarına simdiye kadar sarîh bir tecavüzü vâki‘ olmamıs ise de Marmara'da gayr-ı muharib yolcu nakleden yolcu gemilerine tecavüzden çekinmemis olmalarına ve pây-ı taht civarına kadar sokularak tarassudâtda bulunmalarına nazaran mahzâ Çanakkale mağlûbiyetlerine mukabil bir fikr-i intikam-cûyâne ile tecavüze cüret-yâb olmaları muhtemel görülmekdedir. Devâir-i merkeziyenin sivil rüesâ ve memurîninden Boğaziçi, Haydarpasa, Kadıköy ve Adalar'da sakin olan birçok zevât ile ekseriyetle İstanbul'un sayfiyelerde mukîm kibar-ı sunûf halkının râkib olduğu bu küçük vapurlara mühimmât-ı harbiye ve kuvve-i askeriye irkâb olunmaması Harbiye Nezâret-i Celîlesi'ne yazılmısdır. Düsman tarafından mezkûr sirket vapurlarına bir tecavüz vâki‘ olur ve bir ve birkaç vapurun kazazede olmasına ve birçok nüfus-ı masumenin ziyâ‘ına sebebiyet verilirse hareket-i vâkı‘a simdiye kadar pây-ı tahtda pek emin ve âsûde bir hayat ve maîsete mazhar bulunmus olan düvel-i muhâsama tebaasına karsı efkâr-ı umumiye-i halkda men‘ ve teskîni kâbil olamayacak derece siddetli galeyan-ı hissiyatı ve netice itibarıyla müessif vuku‘âtın zuhûra gelmesini mûceb olabileceği gibi hükûmet tarafından da bi'z-zarûre tebaa-i mezkûreye karsı tedâbîr- i sedîde-i tazyikıye ittihâzına mecburiyet hasıl olacağından bu mesele-i mühimme hakkında simdiden düvel-i muharibenin nazar-ı dikkatlerinin celbi hususu Harbiye nâzırıyla bi'l-müzâkere muvâfık görülmüs olmakla Amerika Sefâreti'ne tebligât-ı acile îfâsı menût-ı re’y-i sâmî-i nezâret-penâhîleridir. Ol bâbda emr u fermân hazret-i veliyyü'l-emrindir. Fî 18 Receb sene 1333 ve fî 19 Mayıs sene 1331 / 1 Haziran 1915 Dahiliye Nâzırı Talat
Bâb-ı Âlî Hariciye Nezâreti İstisâre Odası Aded: 36012/35918 İngiltere Hükûmeti tarafından Depp, Asia ve Queen Alexsandra nâm vapurların hastahâne gemisi ittihâz kılındığını mübelliğ Amerika Sefâreti'nden vürûd edip havale buyurulan 27 Mayıs ve 10 Haziran 1915 tarih ve 315 ve 339 numaralı iki kıt‘a takrîr mütâlaa olunmus ve bu bâbda cevaben Amerika Sefâreti'ne tastîri iktizâ eden müzekkire-i aliyye-i cenâb-ı nezâretpenâhîleri müsveddesi matviyyen takdim kılınmıs olmakla bi't-tebyîz icrâ-yı icabı ve diğer tarafdan 17 Haziran sene 1915 tarih ve 3029/197 numaralı İtalya takrîri üzerine İstişare Odası'nın 10 Haziran sene 1331 tarih ve 36040 numaralı derkenârıyla Harbiye ve Bahriye Nezâret-i Celîleleri'ne tastîr edilmek üzere müsveddesi takdim kılınan tezkire-i aliyye-i cenâb-ı nezâret-penâhîlerine zeylen mârru'z-zikr İngiliz gemilerinin Lahey Konferansı mukarrerâtından muharebât-ı bahriyeye dair olan onuncu mukâvelenâme mûcebince hastahâne gemisi olarak tanınması zımnında icab edenlere evâmir-i lâzıme i‘tâsına dair mezkûr nezâretlere tezkire-i aliyye tastîri ve buna mârru'z-zikr Queen Alexsandra vapurunun eskâl ve ebad ve sairesini mübeyyin melfûf listenin bir sûret-i mütercimesinin de leffi lüzumu ma‘rûzdur. Fî 10 Haziran sene 1331 / 23 Haziran 1915 Bâbıâli Hukuk Müsaviri (İmza) Bâbıâli Hukuk Müsaviri (İmza)
Bâb-ı Âlî Hariciye Nezâreti Umûr-ı Siyasiye Müdüriyet-i Umumiyesi Mühimme Kalemi Kayıd Numarası: 50 Hulâsa: Çanakkale'den asâkir-i Osmaniyye mecrûhînini nakle tahsis edilen sefâine tecavüz edilmemesi Baskumandanlık Vekâlet ve Dahiliye Nezâret-i Celîleleri'ne Dahiliye Emniyet-i Umumiye Müdüriyeti'nin 24 Mahrem numarasını muhtevî 19 Mayıs sene 1331 tarihli tezkire-i aliyyeleri üzerine Harbiye Yedinci Sube'nin 2168/1978 numarasını muhtevi 18 Mayıs sene 1331 tarihli tezkire-i aliyyeleri üzerine Çanakkale'den asâkir-i Osmaniyye mecrûhînini nakle tahsis edilen sefâine Marmara havzasına duhûle muvaffak olan düşman tahtelbahirleri ( Denizaltıları) tarafından tecavüz edilmemesi hususunun İngiltere ve Fransa hükûmetlerine tebliği lüzumu Amerika Sefâreti'ne yazılmıs idi. Fransa Hariciye Nezâreti'nden yazılıp sefâret-i müsârun-ileyhâdan 28 Haziran sene 1915 tarihinde tebliğ edilen cevabda Düvel-i Müttefika'nın an‘anât-ı tarihiyelerine imza ve ittibâ‘ eyledikleri kavânîn-i harbiyeye ale'l-husus namuslarına sâdık kaldıkları ve icrâ eyledikleri harbin yalnız Hükûmet-i Osmaniyye ile onun ordularına müteveccih olduğu beyân olunmakdadır. Keyfiyet ...Celîlesi'ne de yazıldı, efendim. 20 Haziran sene 1331 / 3 Temmuz 1915
Bâb-ı Âlî Hariciye Nezâreti Umûr-ı Siyasiye Müdüriyet-i Umumiyesi Kayıd Numarası: 7520/504 Hulâsa: Hastahâne gemilerinin sûret-i isti‘mâline dair İngiltere Hükûmeti'nin beyânâtı Baskumandanlık Vekâlet-i Celîlesi'ne Amerika Sefâreti'nden alınan 13 Temmuz sene 1915 tarihli takrîrde hastahâne gemilerinin sûret-i isti‘mâline dair İngiltere Hükûmeti'nin beyânâtı âtiyesinin nezâret-i senâverîye is‘ârı için Amerika Hükûmeti'nden talimât alındığı bildirilmekdedir: "Hükûmet-i Osmaniyye Gelibolu Sibh-i Cezîresi'nin garb cihetine takviye kıta‘âtı nakli için vapurlar isti‘mâl etmekde olduğunu ve Hilâl-i Ahmer ve Salib-i Ahmer isarâtını hâmil bulunan aynı vapurların avdetde mecrûhîn naklinde kullanılmakda idüğünü zannetmek için Ğngiltere Hükûmetince esbâbı ciddiye vardır. Böyle bir hareketin Cenevre Mukâvelenâmesi ve bu mukâvelenâmenin muharebe-i bahriyede tatbikine dair Lahey Mukâvelenâmesi ahkâmına ve hukuk-ı beyne'l-milelin mazmûn-ı umumîsine muhalif olduğu bedîhîdir. Eğer asker nakleden vapurlar mecrûhîn nakli için isti‘mâl olunur ise hâmil oldukları isarât-ı muvakkate ne olursa olsun yahud mecrûhînin hayatınca vâki‘ olacak ziyâ‘ ne mertebe esefi mûceb bulunur ise bulunsun İngiliz kuvâsı rast geldikçe onları batırmaya mecbur olacaklardır". Beyânât-ı vâkı‘aya ve hakikat-i keyfiyete nazaran verilecek cevabın inbâ buyurulması mütemennâdır, efendim. 1 Temmuz sene 1331 / 14 Temmuz 1915
Osmanlı Ordu-yı Hümâyûnu Baskumandanlığı Vekâleti Numara: 5984 Müsta‘celdir Hariciye Nezâret-i Celîlesi'ne Ma‘rûz-ı çâker-i kemîneleridir Gelibolu Sibh-i Cezîresi'ndeki kıta‘âtımızı takviye için hastahâne gemileriyle Marmara'dan asker nakletdiğimize dair olan İngiliz beyânâtı pek âsikâr bir yalandır. Tahtelbahirlerin zuhurundan beri deniz yolundan hiçbir sûretle istifade etmediğimiz İstanbul'un çocuklarına bile malumdur. İrkâb ameliyâtını gizlemek tabiatıyla kâbil olamayacağından nakliye gemilerine asker irkâbı sübhesiz bura Amerika Sefâretince malum olurdu. Müttehide-i Amerika sefiri İngiltere'nin iş bu yalanını bizzat tekzîbe muktedirdir. Bundan mâ‘adâ Amerika Salib-i Ahmer etibbâsının hastahâne gemilerimizle gelip gitmesine müsaadeye âmâdeyiz. Eğer İngiliz tahtelbahirleri Osmanlı hastahâne gemilerine taarruz ederlerse bu taarruz hiçbir sebeb-i ciddîye müstenid olmaksızın hukuk-ı beyne'l-milelin pay-mâl edilmesi demek olacağından gark olacak her Osmanlı mecrûhuna mukabil bir İngiliz esirini idam edeceğiz. Ol bâbda emr u fermân hazret-i veliyyü'l-emrindir. Fî 4 Temmuz sene 1331 / 17 Temmuz 1915 Baskumandan Vekili Enver
Taht-ı Himâye-i Hazret-i Mülûkânede Osmanlı Hilâl-i Ahmer Cemiyeti Merkez-i Umumîsi Aded: 1769/301 Hariciye Nezâret-i Celîlesi'ne Ma‘rûz-ı çâker-i kemîneleridir Karargâh-ı Umumî Sahra Sıhhiye Müfettisliği'nden vaki‘ olan taleb üzerine Besinci Ordu tertibât-ı sıhhiyesinin tevsî‘i için Seyr-i Sefâin İdaresi'- ne mensub ve melfûf pusulada hacim ve ebadı murakkam Akdeniz Vapuru Hilâl-i Ahmer Hastahâne gemisi hâline ifrağ edilecek ve sefine-i mezkûrenin yataklarla tefris ve telvîni cemiyetimiz tarafından îfâ olunacakdır. İcabında Akbas Limanı'nda sabit bir halde duracak ve lüzûmunda hasta nakledecek olan bu geminin düsman taarruzâtından vikâyesi için düvel-i muhâsamaya Amerika Sefâreti vasıtasıyla ale'l-usul tebligât-ı lâzımenin îfâsına müsaade buyurulmasını rica eyleriz. Ol bâbda emr u fermân hazret-i veliyyü'l emrindir. Fî 23 Ramazan sene 1333 ve fî 23 Temmuz sene 1331 / 5 Ağustos 1915 Osmanlı Hilâl-i Ahmer Cemiyeti Reis-i Sânîsi Doktor Besim Ömer
Taht-ı Himâye-i Hazret-i Mülûkânede Osmanlı Hilâl-i Ahmer Cemiyeti Merkez-i Umumîsi Aded: 1679/302 Akdeniz Hilâl-i Ahmer Hastahâne Gemisi Hamûle Tonası: 4333 Tûlü: 413.25 kadem Arzı: 48 kadem Umku: 29.66 kadem 23 Temmuz 1331 / 5 Ağustos 1915
Bâb-ı Âlî Hariciye Nezâreti Umûr-ı Siyasiye Müdüriyet-i Umumiyesi Kayıd Numarası: 7849/637 Hulâsa: Hastahâne gemilerinin asker nakliyâtında isti‘mâli keyfiyeti Ordu-yı Hümâyûn Baskumandanlığı Vekâleti'ne Gelibolu Sibh-i Cezîresi'ndeki kıta‘âtımızı takviye için hastahâne gemileriyle Marmara'da asker nakletdiğimize dair olan İngiliz beyânâtının külliyen mugâyir-i hakikat olduğu ve Amerika Salib-i Ahmer etibbâsının hastahâne gemilerimizle gelip gitmesine müsaadeye âmâde olduğumuzu ve İngiliz tahtelbahirleri Osmanlı hastahâne gemilerine taarruz ederlerse gark olacak her Osmanlı mecrûhuna mukabil bir İngiliz esirini idam edeceğimiz ifadesini hâvî olarak vârid olan 4 Temmuz sene 1331 tarihli ve 5984 numaralı tezkirei aliyyeleri üzerine Amerika Sefâreti'ne tebligât-ı lâzıme icrâ ve 2 Temmuz sene 1331 tarihli tebligât-ı resmiyemizin bir fıkrasında zikrolunduğu vechile Temmuz'un ikinci günü öğleden evvel hastahâne isaretini tasıyan gemilerin düsman tarafından asker nakliyatında istihdam edildiği ve bunlarla karaya asker çıkardıkları görüldüğü cihetle muhâsımımızın kendisinin hastahâne gemilerini asker nakliyatında kullanmaması lüzûmu ihtar ve İngiltere Hükûmeti'ne tebliğ-i keyfiyet olunması rica olunmus idi. İngiltere Hükümeti'nin hastahâne gemilerinin asâkir yahud mühimmât-ı harbiye naklinde isti‘mâl edilmis veya edilmekde bulunmus olduklarına dair olan beyânâtı sûret-i kat‘iyyede red eylediğini ve Hükûmet-i Osmaniyye tarafından İngiliz kuvâ-yı askeriyesi aleyhinde dermeyân olunan ithamât-ı saire hakkında Çanakkale' deki İngiliz memurîn-i bahriyesi ile muhâbere olununca bu hususda bir rapor istihsal edileceğini ve Osmanlı hastahâne sefâininin makâsıd-ı gayr-ı mesrû‘ada isti‘mâl olunmaları üzerine İngiliz sefâini tarafından torpille gark edilmeleri takdirinde mukabele-i bi'l-misl icrâsına tasaddî edecek herhangi memurunun sahsen mes’ûl tutulacağını ve Amerika Salib-i Ahmer etibbâsının hastahâne gemilerini ziyaret eylemelerine müsaade olunması hakkındaki teklifin kabul edildiğini mübeyyin olan İngiltere Hükûmeti'nin cevabını ve is bu tebligâta İngiltere Hükûmeti'nin acilen cevab i‘tâsını rica eylediğini müs‘ir olarak Amerika Sefâreti'nden alınan 5 Ağustos sene 1915 tarihli muhtıranın tercemesi leffen tesyîr kılındı. Münderecâtına nazaran bu bâbda İngiltere Hükûmeti'ne i‘tâsı muktezî cevabın inbâsına himmet buyurulması mütemennâdır, efendim. 28 Temmuz sene 1331 / 10 Ağustos 1915
Bâb-ı Âlî Hariciye Nezâreti Umûr-ı Siyasiye Müdüriyet-i Umumiyesi Kayıd Numarası: 7858/648 Hulâsa: Hastahâne gemileri esâmîsi ve tahtelbahir keyfiyeti Ordu-yı Hümâyûn Baskumandanlık Vekâleti'ne 18 Mayıs sene 1331 tarihli ve 1978 numaralı mahremâne tezkire-i aliyyeleri cevabıdır. Çanakkale muharebâtında mecrûh düsecek zâbitân ve efrâdın Ğstanbul'a nakline tahsis edilen Gülnihal Sefinesi'yle Sirket-i Hayriye'nin altmıs bir ve altmıs üç numaralı vapurlarına veya icab-ı hâle göre mecrûhîn irkâbıyla Hilâl-i Ahmer bayrağı altında Bahr-ı Sefîd Boğazı'ndan gelecek vapurlara Marmara havzasında tahtelbahirlerin îrâs-ı mazarrat eylememesi ve bu hususda vukû‘a gelecek her türlü vekâyi‘den tevellüd edecek mehâzîr hakkında Amerika Sefâreti'ne tebligât-ı lâzıme icrâ kılınmıs idi. Fransa Hariciye Nezâreti'nden Paris'deki Amerika Sefâreti'ne irsâl olunan takrîrde harb-ı hâzıra mebnî hastahâne haline ifrâğ olunan Osmanlı ve Fransız hastahâne gemilerinin mütekâbilen taht-ı emniyetde bulundurulması Fransa Hükûmetince arzu edildiği sûret-i kat‘iyede te’min olunmakda ve hükûmet-i mezkûre uhûd ve mukavelâtla uhdesine terettüb eden vezâif ve taahhüdâtı îfâ etmeyi dahi arzu eylemekde bulunduğu cihetle Hükûmet-i Osmaniyyece mecrûhînin nakliyâtına tahsis edilmek istenilen sefâinin isimlerinin Fransa memurîn-i askeriyesine bildirilmek üzere kat‘î olarak bilinmesi arzusunu izhâr eylemekde olduğunu ve sâlifü'z-zikr Gülnihal Vapuru'yla 61 ve 63 numaralı vapurlardan mâadâ diğer sefâin esâmîsinin tebliğ edilmesini rica eylemekde bulunduğunu ve bu bâbda sair ifadâtı hâvî olarak sefâret-i müsârun-ileyhâdan bu kere cevaben ahz olunan 6 ve 9 Ağustos sene 1915 tarihli ve 514 ve 522 numaralı iki takrîrin tercemesi ve sûreti leffen tesyîr edildi. Sefârete verilecek cevabın inbâ buyurulması mütemennâdır, efendim. 29 Temmuz sene 1331 / 11 Ağustos 1915
Osmanlı Ordu-yı Hümâyûnu Baskumandanlığı Vekâleti Sube: 2 Numara: 24656/7883 Hariciye Nezâret-i Celîlesi'ne Ma‘rûz-ı çâker-i kemîneleridir Fî 2 Ağustos sene 1331 tarih ve 69710/1330 numaralı tezkire-i celîlelerine cevaben ma‘rûzdur: İngiltere Hükûmeti'nin Gelibolu Sibh-i Cezîresi'ne karsı vâki‘ olan taarruzunda pek müsbit olarak defa‘âtle hastahâne gemilerini hukuk-ı beyne'lmilel ahkâmına muhalif bir sekilde makâsıd-ı askeriyede istihdam ettiği müdde‘âsına red ile cevab vererek mukabeleten Osmanlı hastahâne sefâininin makâsıd-ı gayr-ı mesrû‘ada istihdam olunmaları üzerine İngiliz sefâini tarafından torpille gark edilecekleri zemininde ithamâtda bulunduğunun Amerika Sefâreti'nden mevrûd muhtıradan müstebân olduğu beyân buyurulmakdadır. Mecrûhîn-i guzât-ı Osmaniyyenin nakline tahsis edilmis olan vapurların simdiye kadar kat‘iyyen ve kâtıbeten makâsıd-ı gayr-ı mesrû‘ada istihdam olunmadıkları malum olmakla beraber bu keyfiyetin mahz-ı hakikat olduğu da düsman tahtelbahirlerinin tevârîh-i muhtelifede Marmara'da isleyen hastahâne gemilerimizi durdurup muayene etmis ve netice-i muayenede mebhûs gemilerin hukuk-ı beyne'l-milelce muayyen mâ-vuzi‘a-lehi gayrisinde kullanılmadıklarını görmüs olmalarıyla mertebe-i sübûta varmakdadır. Bundan mâ‘adâ hastahâne gemilerimizin Amerika Salib-i Ahmer etibbâsı tarafından ziyaretleri de esasen kabul edilmis olmakla ol vechile cevab i‘tâsı menût-ı re’y-i hidîvâneleridir. Ol bâbda emr u fermân hazret-i veliyyü'l emrindir. Fî 11 Ağustos sene 1331 / 24 Ağustos 1915 Baskumandan Vekili nâmına Müstesar İbrahim
Taht-ı Himâye-i Hazret-i Mülûkânede Osmanlı Hilâl-i Ahmer Cemiyeti Merkez-i Umumîsi Aded: 2063/354 Hariciye Nezâret-i Celîlesi'ne Ma‘rûz-ı çâker-i kemîneleridir Ordu-yı Hümâyûn Baskumandanlığı Vekâlet-i Celîlesi'ne irsâl buyurulan fî 5, 12 ve 13 Ağustos sene 1331 tarihli ve 69865/1362, 70288/1438, 70325/1445 numaralı tezâkir-i fahîmâneleri Karargâh-ı Umumî Sahrâ Sıhhiye Müfettis-i Umumîliği'nden cemiyet-i âcizânemize havale olunmakla mütâlaa ve tedkik edildi. El-yevm Hilâl-i Ahmer Hastahâne gemileri Gülnihal, Akdeniz vapurlarıyla Sirket-i Hayriye'nin 60, 61, 63 ve 70 numaralı vapurlarından ibaret olup bunların hakkında lâzım gelen malûmât ve izahât tevârîh-i muhtelifede gerek nezâret-i celîleleri vasıtasıyla gerek beyne'l-milel Salib-i Ahmer Komitesi vasıtasıyla muhâsım devletlerin nazar-ı ıttılâ‘ına vâz‘ edilmis idi. iş bu altı gemiden mâ‘adâ el-yevm ihzâr ve telvîn edilmekde olan Resid Pasa Vapuru hakkındaki malûmât ve izahât dahi mezkûr vapurun tamamen hastahâne gemisi hâline ifrâğına müte‘allik tertibâtın hitâmından sonra huzûr-ı fahîmânelerine arz olunacakdır. Sirket-i Hayriye vapurlarından hastahâne gemisi hâline tahvîl olunan dördünün hacminin ufaklığı hasebiyle teknesi üzerine çizilmesi muktezî ufkî kırmızı pervazın ince olması fi'l-vâki‘ uzakdan görülmesine mani ve vapurların aceleten ihzârı üzerine boyanın bidâyeten mükemmel olmadığı görülmüs olduğundan bu kusurların tashihine ahîren tevessül olunmus ve pek uzakdan rü’yet edilebilecek sûretde Hilâl-i Ahmer bayrakları da vaz‘ edilmis ve isimleri de derdest-i telvîn bulunmusdur. Bu vapurlar hakkında Sirket-i Hayriye Müdüriyet-i Umumiyesi'nden ahîren elde edilen malûmât-ı mütemmime dahi leffen takdim kılınan cedvelde münderic olduğundan tebligât-ı evveliyeye zeylen Amerika Sefâreti'ne is‘ârının lâzım gelenlere emir buyurulması müsterhamdır. Hilâl-i Ahmer Hastahâne gemilerinin Gelibolu'ya azîmetde bir maksad-ı hasmâne ile isti‘mâl edilecek asker ve mühimmât nakline ve ancak avdetde mecrûhîn-i askeriyenin iadesine hizmet etdikleri hakkında evvel ve âhir İngiltere Hükûmeti'nin Amerika Sefâreti vasıtasıyla vâki‘ olan is‘ârâtı asıl ve esasdan külliyen ârîdir. Cemiyetimiz hastahâne gemileri sahne-i harbe azîmetde hiçbir zaman askerî hiçbir memur veya levâzımını götürmemisdir. Keyfiyetin tahkik ve tedkiki için Amerika Salib-i Ahmeri etibbâsından veya herhangi bir bî-taraf memleket Salib-i Ahmeri'nden bir zatın vapuru teftisini kemâl-i memnuniyetle kabul eyleriz. Dersaâdet Amerika Sefâreti'ne İngiltere Hariciye Nezâreti ifadesiyle vârid olup bir sûreti Karargâh-ı Umumî Sahrâ Sıhhiye Müfettisliği'nden cemiyetimize tebliğ olunan fî 16 Ağustos sene 1915 tarihli telgrafnâme müfâdına nazaran İngiltere Hükûmeti'nin bu meseleye bir ehemmiyet-i mahsusa atfetmekde olduğu anlasıldığından müsâra‘ aten cevab i‘tâsına müsaade buyurulmak bâbında emr u fermân hazreti veliyyü'l-emrindir. Fî 17 Ağustos 1331 / 30 Ağustos 1915 Osmanlı Hilâl-i Ahmer Cemiyeti Reis-i Sânîsi Doktor Besim Ömer BOA, HR. SYS, 2179/3
|